“ТУРҒАЙ"

“ТУРҒАЙ”, Нефтекама ҡ. балалар сәнғәт мәктәбенең балалар музыка театры. 1977 й. Төҙөүселәр техника йорто эргәһендә ойошторола, 2002 й. алып хәҙ. статусын ала, 1985 й. башлап “өлгөлө” исемен йөрөтә. Тәүге постановкаһы — А.Н.Толстойҙың “Алтын асҡыс, йәки Буратино мажаралары” (“Золотой ключик, или Приключения Буратино”) әкиәте мотивтары б‑са А.Л.Рыбниковтың “Буратино мажаралары” (“Приключения Буратино”). 1977—2009 йй. 40‑тан ашыу спектакль ҡуйыла: опералар [С.П.Баневичтың “Сыҙамлы ҡурғаш һалдат” (“Стойкий оловянный солдатик”), О. Малышеваның “Ҡырағай аҡҡоштар” (“Дикие лебеди”)], мюзиклдар [Г.И.Гладковтың “Бремен музыканттары” (“Бременские музыканты”) һәм “Ха‑ха‑ха, Хоттабыч”, В.С.Дашкевичтың “Пеппи — Оҙон ойоҡ” (“Пеппи — Длинный чулок”)], Ш.Перроның “Золушка” (А.Э.Спадавеккиа музыкаһы) һәм “Итекле бесәй” (“Кот в сапогах”; С.М.Соснин) әкиәттәре мотивтары б‑са, А.М.Волковтың — “Зөбәржәт ҡалаһы тылсымсыһы” (“Волшебник изумрудного города”; К. Титара), Х.К. Андерсендың — “Ҡар батшабикәһе” (“Снежная королева”; А.Ю.Морсин) һ.б. ш. уҡ исемле муз. спектаклдәр. Спектаклде ҡуйыусылар: Г.А. Кудряшова, Т.И.Кузнецова, БАССР‑ҙың атҡ. мәҙәниәт хеҙм‑ре Л.Х.Йосопова (ойоштороусыһы һәм 1‑се художество етәксеһе), А.М.Яфаева; музыкаль етәксеһе Л.В. Щербакова; хореограф — Е.К.Закирова. Мәскәү балалар һәм мәктәп театр коллективтары хәйриә фестивале (2002), “Яңы быуат таланттары” (“Таланты нового века”; Мәскәү, 2008) Асыҡ дөйөм милли бөтә Рәсәй йәш таланттар фестиваль‑конкурсы, “Алтын тирмә — Золотая юрта” Респ. халыҡ театрҙары фестивале (Дүртөйлө ҡ., 2003; Гран‑при) лауреаты; “Театр яҙы. Сәнғәт — минең мөхәббәтем” (“Театральная весна. Искусство — любовь моя”; Мәскәү, 1996, 2003) балалар музыка коллективтары фестивале дипломанты.

Тәрж. Р.Р.Абдрахманов