“СОДА”, мәҙәни-ял үҙәге

“СОДА” МӘҘӘНИ-ЯЛ ҮҘӘГЕ, 1953 й. Стәрлетамаҡ сода з‑дының (ҡара: “Сода”) мәҙәниәт йорто булараҡ асыла, 1981 й. алып “Сода” ААЙ‑ның мәҙәниәт һарайы, 2013 й. — “Башҡорт сода компанияһы” ААЙ‑ның мәҙәниәт һарайы, 2014 й. башлап хәҙ. исемен һәм статусын йөрөтә. 350 урынлыҡ тамаша залы, дискозалы, түңәрәк эштәре өсөн бүлмәләр, тегеү оҫтаханалары, тауыш яҙҙырыу студияһы, костюм бүлмәһе бар. Мәҙәниәт һарайында 15 үҙешмәкәр сәнғәт ижады коллективы һәм ҡыҙыҡһыныу буйынса клуб эшләй: “Марьяна” фольклор-эстрада ансамбле (1994, 2003 й. алып “халыҡ” исемен йөрөтә; етәксеһе М.В.Гарбуз), “Бенефис” театр мәктәбе (2009, 2012 й. башлап “өлгөлө”; етәксеһе Н.Я.Шор); тынлы оркестр (етәксеһе О.Ю.Зарубин), “Конфетти” эстрада бейеүҙәре коллективы (етәксеһе В.Р.Колеватова), “Фаворит” бал бейеүҙәре ансамбле (етәксеһе И.Р. Төхвәтуллин), “Планета танца” заманса хореография коллективы (етәксеһе К.А.Емельянова), “Мечта” балалар вокаль студияһы (етәксеһе С.М.Рысаева; бөтәһе лә — 2014) һ.б. Үҙәктә йыл һайын “Сәскә ат, тыуған яғым Башҡортостан!” (“Цвети, мой край Башкортостан!”) халыҡ ижады, “Комедия һарайы” (“Комедийная хоромина”) театр фестивалдәре, һүҙ оҫталары, хор коллективтары һәм вокаль ансамблдәр, хореография һ.б. конкурстар үткәрелә.

Тәрж. Р.Р.Абдрахманов